Məhkəmə prosesinə şahid qismində dəvət olunmuş sözügedən məqalələrin müəllifi, “Yeni Müsavat” qəzetinin müxbiri Elşən Qədimov (Balaxanlı) isə prosesdə iştirak etməyib.
Hakim A. Rzayev məhkəmənin əvvəlində tərəflərə barışıq təklif etdi. Cavabdeh Hüseynov Zakir bildirdi ki, sözügedən məqalələrdə yer alan ifadələrin heç biri ona məxsus deyil və bundan sonra qəzetlərdə xüsusi ittihamçı barədə hər hansı kobud ifadələrə yol verməyəcəyi barədə iltizamı yazılı surətdə hakimə təqdim etdi.
Xüsusi ittihamçı Şirinova Solmaz bununla razılaşmadığını və cavabdehin barəsində müvafiq cəza tədbirinin görülməsini məhkəmədən xahiş etdi.
Hakim A. Rzayev barışıq təklifini bir daha xatırladaraq, qərarı elan etmək üçün prosesi 9 dekabr saat 10:00-a təyin etdi.
Xatırladaq ki, vətəndaş Şirinova Solmaz vətəndaş Hüseynov Zakirin şikayət ərizəsinə əsasən “Yeni Müsavat” qəzetinin 18. 03. 2010-cu il tarixli sayında dərc olunmuş yazılarda “Həkim Qəninin mülkiyyəti uğrunda dava”, 21. 01. 2009-cu il tarixli sayında “Apellyasiya Məhkəməsinin hakimi qazı rolunda” və “İnter plus” qəzetinin 16-20 aprel 2009-cu il tarixli saylarında “Apellyasiya Məhkəməsi də şəriət qanunlarına “hə” dedi” və s. məqalələrdə şərəf və ləyaqətinin alçaldıldığını və haqqında təhqiramiz ifadələrin işlədildiyini bildirərək, Yasamal rayon Məhkəməsinə müraciət edərək, onun CM-nin 147 və 148-ci maddələrinə əsasən cəzalandırılmasını istəmişdir.