“Korrupsiya və Cəmiyyət” jurnalı Mətbuat Şurasına qarşı qaldırdığı iddia üzrə yerli instansiyaların qərarlarından narazı qaldığı üçün Avropa insan Haqları Məhkəməsinə şikayət göndərib.
Xatırladaq ki, Mətbuat Şurası “Korrupsiya və Cəmiyyət” jurnalını “reket mətbuat” siyahısına daxil etdiyi üçün M. Əhmədoğlu, Mətbuat Şurasının təkzib verərək üzr istəməsi və dəymiş maddi ziyana görə 4.000 (dörd min) manat, mənəvi ziyana görə 100000 (yüz min) manat ödəməsi barədə iddia qaldırmışdı. 30 iyun 2009-cu il tarixdə Binəqədi rayon Məhkəməsi iddianın təmin edilməməsi barədə qərar çıxarmış və Bakı Apellyasiya Məhkəməsi 16 sentyabr 2009-cu il tarixində baş redaktorun apellyasiya şikayətinin təmin olunmamasına qərar vermişdi. Ali Məhkəmə də 18 yanvar 2010-cu ildə bu iş üzrə verilən kassasiya şikayətini təmin etməmişdi.
Jurnalın baş redaktorunun verdiyi digər məlumata görə, o beynəlxalq təşkilatların Bakıdakı nümayəndəliklərinə, demokratik ölkələrin səfirliklərinə və yerli jurnalist təşkilatlarının və aparıcı KİV rəhbərlərinə müraciət edərək Mətbuat Şurası ilə əməkdaşlıqdan imtina etməyə çağırıb.