Ötən il "Korrupsiya və cəmiyyət" jurnalını məhkəməyə vermiş Nigeriya əsilli Britaniya vətəndaşı Adiola Aqbabiaka barəsində başlanmış cinayət işini aparan müstəntiq Rövşən Musayevin qəfil vəfat etməsi ilə əlaqədar mətbuat konfransı keçirilib.
Konfransda çıxış edən "Korrupsiya və cəmiyyət" jurnalının baş redaktoru Məmməd Əhmədoğlu vurğuladı ki, Rövşən Musayev Aqbabiaka barəsində cinayət işini obyektiv araşdırdığından, onun təzyiqlər nəticəsində vəfat etməsi istisna deyil: "Mən bəyan etmək istəyirəm ki, artıq bizə də təzyiqlər olur. "Zeytun bağları"nda baş vermiş hadisəyə görə bir jurnalisti bu qədər təqib edirlərsə, belə beynəlxalq məsələyə görə bizə göstərilə biləcək təzyiqlərdən narahatıq". Xatırladaq ki, Aqbabiaka barəsində ifşaedici məqalə yazdığına görə "Korrupsiya və cəmiyyət" jurnalı və jurnalın baş redaktoru Aqbabiaka və nümayəndəsi tərəfindən məhkəməyə verilmişdi. Məhkəmə araşdırması davam edir.