10 saylı cəzaçəkmə müəssisəsində cəza çəkən “Azadlıq” qəzetinin əməkdaşı, satirik yazar Sakit Zahidovun (Mirzə Sakit) məhkəməyə yazdığı şikayət ünvanına çatdırılmayıb.
Bu barədə məlumatı Reportyorların Azadlıq və Təhlükəszilik İnstitutuna (RATİ) jurnalistin vəkili İsaxan Aşurov verdi: ”Martın 17-də Mirzə Sakitin amnistiya haqqı tanınsa da, o, bugünədək azadlığa buraxılmır. Buna görə də Mirzə Sakit məhkəməyə şikayət yazaraq həbsxana rəhbərliyinə təqdim edib, ancaq şikayət qəbul olunmadı”.
Belə ki, İ.Aşurov aprel ayının 3-ü Nərimanov rayon məhkəməsinə cəzaçəkmə müəssisəsinin rəhbərinin qanunsuz hərəkətindən əlavə şikayət ərizəsi verəcək. Vəkil qeyd etdi ki, qanunvericiliyə görə, məhbuslar yazdıqları şikayəti həbsxana rəhbərliyinə, həbsxana rəhbərliyi isə məhkəməyə təqdim etməlidir.
İ. Aşurovun sözlərinə görə, 10 saylı cəzaçəkmə müəssisəsinin rəhbəri vəkilin bu istiqamətdə verəcəyi suallardan və telefon zənglərindən yayınır.
Bu məsələ ilə bağlı 10 saylı cəzaçəkmə müəssisəsinin rəhbərliyi ilə gün ərzində telefon əlaqəsi yaratmağa çalışsaq da, bu cəhdlər baş tutmayıb.
Xatırladaq ki, Sakit Zahidov (Mirzə Sakit) narkotik maddə saxlama ittihamı ilə 3,5 il müddətinə azadlıqdan məhrum edilib. 2009-cu il martın 17-də qüvvəyə minən amnistiya aktı ilə cəzasının qalan hissəsindən azad edilib.