Bununla əlaqədar bəzi məsələləri dəqiqləşdirmək üçün E. Quliyevlə əlaqə saxladıq. Vəkil yuxarıda qeyd edilənləri təsdiqləyərək vurğuladı ki, “biz iş materialları ilə tanış olmaq xahişi ilə istintaqa müraciət etmişik. Bu həftə Hüseynovun işini araşdıran müstəntiqlə görüşəcəm. Bəzi məsələləri onunla üzbəüz danışacağam”. Quliyev Avropa Məhkəməsinə müraciət etmək niyyətlərinin olduğunu da qeyd edib.
Elmar Hüseynovun işi ilə bağlı Avropa İnsan Haqları Məhkəməsinə müraciət etməyin hüquqi cəhətdən mümkünlüyünü müəyyənləşdirmək məqsədilə Media Hüququ İstitutunun rəhbəri Rəşid Hacılıya müraciət etdik. R. Hacılı RATİ-nin əməkdaşı ilə söhbətində bildirdi ki, “Quliyev jurnalistin ailəsinin vəkili kimi müraciət edə bilər. İstintaqın başa çatıb-çatmaması önəmli deyil. Əgər biz hesab ediriksə, işin açılmaması üçün istintaq düzgün aparılmır və ya yubadılır, bu hüquq pozuntusudur. Və təbii ki çox ciddi əsaslar var ki, Avropa Məhkəməsinə müraciət etmək olar. Burada ədalətli araşdırma hüququ (Avropa İnsan Haqları Konvensiyanın 6-cı maddəsi) pozulub. Eyni zamanda məlumdur ki, Elmar Hüseynov jurnalist fəaliyyətinə görə və araşdırma yazılarına görə öldürülüb. Bu isə Konvensiyanın 10 –cu maddəsinin (fikir ifadə etmək azadlığı) pozulması deməkdir”.