Dünən (27 may) vəkili, “Media Hüququ İnstitutu”-nun (MHİ) direktoru Rəşid Hacılı 17 saylı cəzaçəkmə müəssisəsində cəza çəkən “Azadlıq” qəzetinin baş redaktoru Qənimət Zahidlə (Zahidov) görüşüb.
Bu barədə Reportyorların Azadlıq və Təhlükəsizlik İnstitutuna (RATİ) R. Hacılının özü məlumat verib. Onun bildirdiyinə görə, baş redaktor saxlanma şəraitindən və səhhətindən şikayət etməyib: ”Biz onun qanunsuz həbs olunması, əlyazmalarının məhv edilməsi barədə, həmçinin işi ilə bağlı aparılan araşdırmalar ətrafında danışdıq”, – deyə R. Hacılı bildirdi.
Xatırladaq ki, Q. Zahid (Zahidov) CM – nin 127. 2.3 (xuliqanlıq niyyəti ilə qəsdən sağlamlığa az zərər vurma) maddəsi ilə ittiham olunaraq 3 il, 6 ay, CM – nin 221-ci maddəsi ilə ittiham edilməklə isə 6 ay olmaqla ümumiyyətlə, 4 il müddətinə azadlıqdan məhrum edilib.