Dünən (27 may) 2 saylı cəzaçəkmə müəssisəsində Əzizbəyov rayon Məhkəməsinin hakimi Fatimə Miriyevanın sədrliyi ilə “Bizim Yol” qəzetinin həbsdə olan əməkdaşı Müşfiq Hüseynovun səhhəti ilə bağlı cəzasının qalan hissəsindən azad edilməsi ilə əlaqədar qaldırılmış iddia üzrə məhkəmə prosesi keçirilib.
Bu barədə Reportyorların Azadlıq və Təhlükəsizlik İnstitutuna (RATİ) M. Hüseynovun vəkili İsaxan Aşurov məlumat verib. Onun sözlərinə görə, məhkəmə Hüseynovun iddiasını rədd edib:
“Müşfiq Hüseynov səhhətində olan ciddi problemlərə görə Cinayət Məcəlləsinin 78-ci, Cəzaların İcrası Məcəlləsinin 167-ci maddəsinə əsasən cəzasının qalan hissəsindən azad ola bilərdi. Amma hakim ədalətsiz qərar çıxardı”.
Xatırladaq ki, M.Hüseynov 2007-ci il, iyulun 24-də həbs olunub. Ona qarşı CM-nin 311-ci maddəsi (rüşvət alma ) ilə ittiham irəli sürülüb və 2008-ci ilin yanvar ayında o 6 il müddətinə azadlıqdan məhrum olunub. Bakı Apellasiya Məhkəməsi isə M.Hüseynovun cəzasını 1 il azaldıb.