Bu gün axşam saat 21. 30-da “Lider” televiziyasında “İflas” filmi yenidən yayımlanacaq.
“Lider” TV-nin xəbərlər proqramı olan “Səda” verilişinin axşam buraxılışında “İflas” filmi ilə bağlı süjet göstərilib. Süjetdə bildirilir ki, sadə vətəndaşların çoxsaylı zəngləri bu filmin yüksək qiymətləndirildiyini göstərir, telekanala isə bu mövqeyinə görə təşəkkürlərini bildirirlər: “İzləyicilərimiz araşdırma verilişlərinin və polemikaların zəruriliyini duyurlar. Tamaşaçıların geniş istəyini nəzərə alaraq film bu gün yenidən “Lider” televiziyasında yayımlanacaq.
“Səda” proqramından dərhal sonra efirə gedən “Sitatın sonu” verilişində isə bildirilir ki, Əli Kərimli kanalı məhkəməyə verə bilmir. Çünki kanal heç bir təhqir elementinə yol verməyib. Filmdəki fikirlər “Lider”-in müxbirlərinə deyil, vaxtilə Əli Kərimlinin müttəfiqləri olmuş şəxslərə aiddir. “Lider” onlara sadəcə efir verib.
RATİ filmdə danışan şəxslərin “Lider”-ə müraciət etməsi və ya əksinə “Lider”-in həmin şəxslərə müraciət etməsi məsələsini dəqiqləşdirmək üçün RATİ həmin şəxslərdən bəziləri ilə əlaqə saxlayıb.
AXC-nin keçmiş üzvü Təhmasib Novruzov “Lider” telekanalının ona müraciət etdiyini bildirib: “Gününü dəqiq xatırlamıram. “Lider” kanalından mənə zəng vurdular, bu barədə film çəkmək istədiklərini bildirdilər, mən də razılaşdım”.
RATİ Ramiz Tağıyevlə əlaqə saxlaya bilməyib.
* Filmdə İsgəndər Həmidovun danışdığı videokadrlar gizli çəkiliş nəticəsində əldə edilmiş kadrlardır.
Qeyd edək ki, RATİ bu gün (29 aprel) “İflas” filmi ilə əlaqədar bəyanat yayıb. Bəyanatda kanalın bu cür film nümayiş etdirməsi pislənilir. RATİ eyni zamanda Milli Televiziya və Radio Şurasının sədri Nuşirəvan Məhərrəmliyə filmlə bağlı müraciət edib və Şura sədrindən məsələyə rəsmi münasibət bildirməyini xahiş edib.