“Azadlıq” qəzetinin baş redaktoru Qənimət Zahidin (Zahidov) 1 saylı Bayıl İstintaq Təcridxanasında cəza çəkərkən yazdığı kitabın əl yazmaları qeyri-qanuni olaraq müsadirə edilib.
Bu barədə RATİ-yə dünən (1 iyun) baş redaktorla 17 saylı cəzaçəkmə müəssisəsində görüşən həyat yoldaşı Ayəndə Mürsəliyeva məlumat verib.
”Azərbaycanın müasir tarixindən bəhs edən kitabı Bayıl İstintaq Təcridxanasının rəisi Misir Əliyev oxumaq adı ilə müəllifdən alıb. Daha sonra isə o, kitabı geri qaytarmayıb. Biz Əliyevlə əlaqə saxladıq. O, bizə kitabın onda olmadığını və əlyazmaların Ədliyyə Nazirliyi Məhkəmə Qərarları Xidmətinin Baş İdarəsinə verdiyini söylədi. Buna səbəb kimi kitabda Heydər Əliyev və İlham Əliyevin əleyhinə yazıların olması göstərilir”, – deyə qeyd edən A. Mürsəliyevanın sözlərinə görə, əgər əlyazmalar müəllifə qaytarılmasa bu halda məsələ ilə bağlı məhkəməyə müraciət ediləcək.
Habelə həyat yoldaşı baş redaktorun səhhəti ilə bağlı heç bir problemin olmadığını, saxlanma şəraiti və həbsxana administrasiyasının ona qarşı münasibətindən heç bir şikayətinin olmadığını deyib.