“Turan” İnformasiya Agentliyinin məlumatına görə, Daxili İşlər Nazirliyi millət vəkili Cəmil Həsənlinin RATİ-nin sədri Emin Hüseynova qarşı bu il iyunun 14-də Nəsimi rayon 22-ci polis bölməsində zorakılıq faktı ilə bağlı məktubuna cavab verib.
Məktubda DİN daxili Təhqiqatlar İdarəsinin rəisi Arif Rzayev tərəfindən cavablandırılıb.
Cavab məktubunda bildirilir ki, E.Hüseynovun bədənində tibbi müayinə zamanı hər hansı bir xəsarət və xəsarətin obyektiv əlamətləri aşkar edilməyib, ona “nevrotik reaksiya” diaqnozu təyin edilib. Həmçinin Hüseynovun “Alaturka” kafesindən polis bölməsinə gətirildikdən sonra zorakılığa məruz qalması təsdiqlənməyib.
E.Hüseynov A.Rzayevin məktubda dediklərini “ağ yalan” hesab edir: ”22-ci polis bölməsində boynuma əl ilə güclü zərbə endirilib. Musa Nağıyev adına təcili yardım xəstəxanasına daxil olan zaman mənə gizlin kəllə-beyin travması diaqnozu qoyulub. Sonradan bu diaqnoz saxta “nevrotik reaksiya” diaqnozu ilə əvəz olunub”.
RATİ qeyd edir ki, Emin Hüseynov üzləşdiyi zorakılıqla əlaqədar yaxın günlərdə mətbuat konfransı keçirəcək.