“Azadlıq” qəzetinin əməkdaşı Aqil Xəlilin (Xəlilov) təhlükəsizliyini təmin etmək üçün Daxili İşlər Nazirliyi tərəfindən Çevik Polis Alayının iki əməkdaşı ayrılıb. Bu xəbəri Reportyorların Azadlıq və Təhlükəsizlik İnstitutuna (RATİ) Xəlilin özü bildirib.
Xəlil onu da bildirib ki, həmin iki nəfər polis əməkdaşı gün ərzində hara getməsindən aslı olmayaraq onun yanında olurlar.
Xatırladaq ki, Aqil Xəlil "Zeytun bağları" ərazisində ağacların kəsilməsi ilə bağlı reportaj hazırlayarkən 22 fevral 2008-ci il tarixində biri Milli Təhlükəsizlik Nazirliyinin əməkdaşı olmaqla iki nəfər tərəfindən döyülmüş, martın 13-də isə ürək nahiyəsindən bıçaqlanmışdı.