Həbsdə olan “Azadlıq” qəzetinin əməkdaşı, jurnalist satirik Mirzə Sakitin səhhətində ciddi problemlər var.
Bu haqda RATİ-yə məlumat verən jurnalistin həyat yoldaşı Rəna Zahidova bildirib ki, yanvar ayının 2-də onunla görüşüb. Jurnalistin 14 saylı Cəzaçəkmə müəssisəsinin tibb məntəqəsində saxlanıldığını vurğulayan R.Zahidova jurnalistin ürəyində və ayaqlarında şiddətli ağrıların olduğunu qeyd edib. “Eyni zamanda o həddindən artıq çəki itirib”.
RATİ bununla əlaqədar 14 saylı Cəzaçəkmə müəssisəsinin rəisi Ərşad Həsənovla əlaqə saxladı. Ə.Həsənov hər hansı bir məlumat verməkdən imtina edərək, Ədliyyə Nazirliyinin Penitensiar Xidmətinin İctimaiyyətlə Əlaqələr şöbəsinin rəisi Mehman Sadıqovla əlaqə saxlamağı məsləhət gördü. Bayram günləri olduğu üçün Mehman Sadıqovla əlaqə saxlaya bilmədik.