NOVRUZƏLİ MƏMMƏDOVUN KASSASİYA ŞİKAYƏTİ DƏ TƏMİN OLUNMADI

may 28th, 2009
Dünən (27 may) Ali Məhkəmədə hakim Tapdıq Mahmudovun sədrliyi ilə CM-nin 274 (“Dövlətə Xəyanət”) maddəsi ilə məhkum edilmiş “Tolışi Sədo“ qəzetinin baş redaktoru Novruzəli Məmmədovun vəkili Ramiz Məmmədovun Bakı Apellyasiya Məhkəməsinin 26 dekabr 2008-ci il tarixli qərarından verdiyi kassasiya şikayətinə baxılmışdır.

Bu barədə Reportyorların Azadlıq və Təhlükəsizlik İnstitutuna (RATİ) N.Məmmədovun Hüquqlarını Müdafiə Komitəsinin sədri Hilal Məmmədov məlumat verib.
Qeyd edək ki, Ağır cinayətlərə dair işlər üzrə məhkəmədə hakim Şahin Abdullayevin sədrliyi ilə keçirilən məhkəmə prosesində  N.Məmmədov 10 il müddətində azadlıqdan məhrum olunub. N.Məmmədovun həbsdən qeyri-şərtsiz azad olunması və onun həbsində günahkar olan şəxslərin məsuliyyətə cəlb olunması ilə bağlı 26 dekabr 2008-ci il tarixində apelliyasiya şikayətinə baxılıb və şikayət təmin olunmamışdır.
H.Məmmədovun sözlərinə görə, dünən qapalı keçirilən məhkəmə prosesində N.Məmmədovun məhkəmədə iştirak etməsi ilə bağlı qaldırdılmış vəsatət təmin olunmayıb. Məhkəmə ilk instansiya məhkəməsinin hökmünü qüvvədə saxlamaqla kassasiya şikayətini rədd etmişdir.
H.Məmmədov N.Məmmədovun Avropa Konvensiyasında nəzərdə tutulan hüquq pozuntuları ilə əlaqədar Avropa Məhkəməsinə şikayət hazırladıqlarını da bildirdi.