Martın 28-də Sumqayıt şəhər Məhkəməsində qanunsuz narkotik maddə saxlamaqda ittiham olunan AXCP gənclər təşkilatının üzvü Cabbar Savalanlının işi üzrə növbəti məhkəmə prosesi keçiriləcək. Bu barədə “Turan”a gənc fəalın vəkili Anar Qasımov məlumat verib.
Belə ki, ekspertiza Savalanın narkotikadan fiziki və psixoloji asılılığını müəyyən etməyib və onun icbari müalicəyə ehtiyacı yoxdur. Bununla yanaşı, ekspertlər gəncin narkotik maddədən istifadə etməsinin mümkünlüyünü istisna etməyiblər. Bu o deməkdir ki, Savalanlı narkotika istifadəçisi kimi tanına bilər. Necə ki, bu, Eynulla Fətullayevlə baş vermişdi.
Xatırladaq ki, Cabbar Savalanlı fevralın 5-də qanunsuz narkotik saxlamaq ittihamı ilə həbs edilib. Cabbar Savalanlıya Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi açılıb. Lakin onun sosial şəbəkələrdə iqtidar əleyhinə səsləndirdiyi fikirlərə görə həbs olunmağı istisna edilmir.