“Azadlıq” qəzetinin əməkdaşı Seymur Həziyevin döyülməsi ilə bağlı hər hansı bir yenilik yoxdur. Bu barədə aprelin 7-də RATİ-yə Seymur Həziyev özü məlumat verib. Jurnalist oğurlanılaraq döyülməsinə görə cinayət işini başlandığını, amma istintaqın gedişi barədə ona hər hansı məlumatın verilmədiyini bildirib.
“Azadlıq” qəzetinin digər əməkdaşı – Ramin Deko isə RATİ-yə bildirib ki, döyülməsi faktı ilə bağlı dünən 1 saylı Klinik Xəstəxanasında müayinədən keçib. Həkimlər ona alın nahiyəsinin sıyrılması və yumşaq toxumanın əzilməsi diaqnozunu qoyublar.
Xatırladaq ki, martın 25-dən 26-a keçən gecə saat 00.30 radələrində “Azadlıq” qəzetinin müxbiri Seymur Həziyevin yaşadığı Abşeron rayonunun Ceyranbatan qəsəbəsinin girişindən başına torba keçirilərək oğurlanılıb və naməlum ünvana aparılaraq işgəncəyə məruz qoyulduqdan sonra Binəqədi rayonu ərazisində küçəyə atılıb. “Azadlıq” qəzetinin müxbiri Ramin Deko isə aprelin 3-də naməlum şəxslər tərəfindən oğurlanmış, bir gün sonra isə naməlum şəxslərin fiziki hücumuna məruz qalmışdır. Hər iki jurnalist baş verənlərin məhz onların peşə fəaliyyəti ilə əlaqəli olduğunu bildirirlər.