Xarici ölkələrin Azərbaycandakı diplomatik korpuslarının nümayəndələri 12 saylı cəzaçəkmə müəssisəsində cəza çəkən “Gündəlik Azərbaycan” və “Realnıy Azerbaydjan” qəzetlərinin baş redaktoru Eynulla Fətullayevə görüşüblər.
Bu barədə APA-ya İşgəncələrə Qarşı Azərbaycan Komitəsinin sədri Elçin Behbudov məlumat verib. Komitə sədri görüşün ATƏT-in Bakı ofisinin təşəbbüsü ilə həyata keçirildiyini bildirib. Görüşdə ATƏT-in, Avropa Şurasının, ABŞ, Fransa, Norveç və Almaniyanın Azərbaycandakı diplomatik nümayəndələrinin təmsilçiləri iştirak edib. Diplomatlar həmçinin Cəzaçəkmə Müəsisəsinin cərimə otaqlarına da baxış keçiriblər.
Görüş barədə RATİ-yə məlumat verən Norveç səfirliyinin birinci katibi Riçard Skarboro sözlərinə görə, təxminən iki saat çəkən görüş ayrıca otaqda keçirilib. “Eynulla Fətullayev görüş zamanı heç bir şikayətinin olmadığını, azad olunası üçün yalnız Avropa Məhkəməsinə ümid olduğunu söylədi. Habelə, beynəlxalq təşkilatlardan onun işini diqqətdə saxlamalarını xahiş etdi”, – deyə Skarboro bildirdi.