Şənbə günü (24 yanvar) qohumu Cavidan Hüseynov 2 saylı cəzaçəkmə müəssisəsində cəza çəkən “Bizim yol” qəzetinin əməkdaşı Müşfiq Hüseynovla görüşüb. Bu barədə RATİ-yə C. Hüseynovun özü məlumat verib: ”Müşfiq Hüseynovun səhhəti normaldır, saxlanma şəraiti ilə bağlı da heç bir problemi yoxdur”.
C. Hüseynov onu da bildirib ki, M. Hüseynov cəzaçəkmə müəssisəsində açdığı ingilis dili kursunda ingilis dilini öyrənən məhkumların sayı artır.
Xatırladaq ki, Müşfiq Hüseynov Cinayət Məcəlləsinin 311.1-ci maddəsi (rüşvət alma) ilə ittiham edilərək Ağır Cinayətlərə Dair İşlər Üzrə Məhkəmənin hakimi Camal Ramazanovun 21 yanvar 2008-ci il tarixində çıxardığı qərar ilə 6 il müddətinə azadlıqdan və 2 il müddətinə jurnalist fəaliyyəti ilə məşğul olmaq hüququndan məhrum edilib. Bakı Apellyasiya Məhkəməsinin hakimi Sahibxan Mirzəyevin 04 aprel 2008-ci ildə çıxardığı qərara əsasən, jurnalistin həbs müddəti bir il azaldılaraq, beş ilə endirilib.