“Yeni Müsavat” qəzeti ilə bağlı köhnə məhkəmə qərarları yenidən icraata yönəldilib. Bu barədə Reportyorların Azadlıq Təhlükəsizlik İnstitutuna (RATİ) qəzetin baş redaktoru Rauf Arifoğlu məlumat verib.
O bildirib ki, hələ 2008-ci ildə prezident İlham Əliyevin göstərişi ilə kütləvi informasiya vasitələrinin borcları, əsasən də “Yeni Müsavat” və “Azadlıq” qəzetlərinin məhkəmə cərimələri dondurulmuşdur.
Məhkəmə Qərarlarının İcrasına Nəzarət İdarəsindən zənglər və məktublar gəldiyini qeyd edən baş redaktor buna Ali Məhkəmənin sədri Ramiz Rzayevlə bağlı tənqidi məqalələrin səbəb olduğunu bildirib: “Məhkəmə cərimələri ilə bağlı zənglərə cavab olaraq prezidentin tövsiyəsi olduğunu xatırladarkən, bildirilib ki, qəzetimizlə bağlı iddiasını geri götürənlər olsa da, iddiası qüvvədə olanların cərimələri ödənməlidir”.
Baş redaktor problem aradan qaldırılmayacağı təqdirdə müdafiə tədbirləri görüləcəyini bildirib.