Aprelin 27-də “Azadlıq” qəzetinin əməkdaşı Xalid Qarayev fiziki hücuma məruz qalıb. Bu barədə bu gün Reportyorların Azadlıq və Təhlükəsizlik İnstitutuna (RATİ) Xalid Qarayev məlumat verib. Jurnalistin sözlərinə görə bu gün səhər saatlarında işə gedərkən “20 yanvar” metrosunun yaxınlığından keçərkən bir taksi sürücüsünün Nəqliyyat Nazirliyinin əməkdaşları tərəfindən döyüldüyünün şahidi olub:
“Vəziyyəti gördükdə yaxınlaşıb özümü təqdim etdim və jurnalist olduğumu bildirərək, nə baş verdiyini soruşdum. Bu zaman nazirliyin maşınının içərisində əyləşmiş digər şəxs maşından düşərək yanımıza
gəldi və hər ikisi məni itələyərək, zərbələr endirməyə başladılar. Onlar mətbuatın ünvanına ağır ifadələr söylədilər, istədiklərini edə biləcəklərini deyərək, fotokameramı əlimdən aldılar. Sonra da maşınlarına əyləşərək, çıxıb getdilər” –deyən X. Qarayev durumla bağlı Nəqliyyat Nazirliyinə və Mətbuat Şurasına edilən zənglərin nəticəsiz olduğunu bildirdi.
Onu da qeyd ed’k ki, təsadüfən hadisə yerinə gəlmiş azadlıq qəzetinin siyasət şöbəsinin müdiri Seymur Həzi vəsiqəsini göstərməklə hadisəyə müdaxilə etməyə çalışarkən nəqliyyat nazirliyinin müfəttişləri ona da kobudluq göstərərək Azadlıq qəzetinin ünvanına nalayiq sözlər işlədiblər.