EYNULLA FƏTULLAYEVİN ŞƏXSİ SAYTI YARADILIB

yanvar 10th, 2009
“Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru Eynulla Fətullayevin şəxsi saytı yaradılıb.

Bu barədə RATİ-yə fəaliyyətini dayandırmış “Gündəlik Azərbaycan” qəzetinin şef-redaktoru Şahvələd Çobanoğlu məlumat verdi:
”Eynulla Fətullayevin adına sayt yaratmaq ideyası onun  ad günü ərəfəsində meydana gəldi. Sayt texniki cəhətdən hazır idi, yalnız dizayn, saytın adının və  domenin necə olması ilə bağlı suallar yaranmışdı. Bu məsələ də  tezliklə öz həllini tapdı. www.eynulla.info ünvanında yerləşən  sayt Eynulla Fətullayevin  şəxsi saytı statusunda fəaliyyət göstərir. Saytda baş redaktorun həyat və fəaliyyəti, həbsi, məhkəməsindən hazırlanan reportajlar, barəsində yazılan məqalələr öz əksini tapıb. Sayt gündəlik olaraq yenilənir və ora hər gün baş redaktorla  bağlı ən son məlumatlar yerləşdirilir.  Habelə  saytda  həbsdə olan digər jurnalistlərlə bağlı da  xəbərlər yerləşdirilir”.