Bu gün (28 aprel) Media Hüququ İnstitutunun (MHİ) ofisinə gələn polis mayoru təşkilatın əməkdaşları ilə bağlı məlumat almaq istəyib.
Bu barədə Reportyorların Azadlıq və Təhlükəsizlik İnstitutuna (RATİ) MHİ-nin proqram koordinatoru Xalid Ağəliyev məlumat verib. Onun sözlərinə görə, saat 16.00-17.00 radələrində ofisə gələn Nəsimi Rayon Polis İdarəsinin əməkdaşı, polis mayoru Şahin Kərimov rəisin göstərişinə əsasən gəldiyini deyib. Polis mayoru qeyd edib ki, ərazidə yerləşən butun təşkilatların araşdırılması üçün məlumatlar toplayırlar. O, MHİ-də çalışan hər kəsin haqqında ətraflı məlumat – ad, soyad, ev ünvanı, telefonlarını və s. istəyib. Xalid Ağəliyev isə bu məlumatları verməkdən imtina edib. Polis mayoru daha sonra bildirib ki, rəis ofisin eyvanında asılmış Azərbaycan bayrağının yığışdırılmasına göstəriş verib. X.Ağəliyev buna da etiraz edərək bildirib ki, belə bir göstəriş verilibsə, əsaslandırılmış və şəkildə yazılı təqdim olunsun. Bundan sonra polis mayoru ofisi tərk edib.