Bu gün (13 mart) Mətbuat Şurasının (MŞ) monitorinq qrupu, Amerika Birləşmiş Ştatlarının (ABŞ) Azərbaycandakı səfirliyinin maliyyə dəstəyi ilə apardığı "Mətbuatda peşə etikası, norma və qanunlarının gözlənilməsi" adlı monitorinqin birinci mərhələsinin yekunlarını açıqlayıb.
Bununla bağlı keçirilən mətbuat konfransında MŞ-nın sədri Əflatun Amaşov bildirib ki, bir ay ərzində aparılmış monitorinq nəticəsində ümumilikdə 2545 peşə etikası pozuntusu aşkarlanıb. Şura sədrinin sözlərinə görə monitorinqdə pozuntular 50 kod vasitəsilə simvollaşdırılsa da qeydə alınmış pozuntular əsasən 13 kodun, özgə müəllifin istinad edilmədən istifadə, özgəsinin materialının müəllifi göstərilmədən öz imzası ilə istifadə, balansın pozulması, jurnalistin tərəf kimi çıxış etməsi kodlarının əhatəsində cəmləşib.
Ə. Amaşov sonda onu da qeyd edib ki, 2010-cu ilin fevral ayının 1-i tarixini qədər davam edəcək monitorinq, ölkədə azərbaycan və rus dillərində dövrü nəşr olunan 57 mətbu KİV-i və 3 internet-saytını əhatə edir.