Naxçıvanda Reportyorların Azadlıq və Təhlükəsizlik İnstitutunun bölgə müxbiri Həkimeldostu Mehdiyevə qarşı təxribat hazırlanır. Dünən (09 iyul) mülki geyimli polislər müxbirin yaxınlarından birini təhdid edərək onun vasitəsilə H.Mehdiyevə bir neçə ədəd patron verməsini təklifi ediblər. Plana əsasən həmin adam H.Mehdiyevə patron verərkən müxbir həbs olunmalı imiş. Əvvəlcə bununla razılaşan şəxs sonradan müxbirə ehtiyatlı olması üçün xəbərdarlıq edib. Bu barədə RATİ-yə H.Mehdiyevin özu məlumat verib.
Qeyd edək ki, H. Mehdiyev son dövrlər Muxtar Respublikada mütəmadi olaraq təziqə məruz qalmış jurnalistlərdən biridir. O, son olaraq 31 yanvar 2009-cu il tarixdə saat 10:00-da RATİ-nin Naxçıvandakı bölgə müxbiri Həkimeldostu Mehdiyev müxalifət partiyalarının Azərbaycan Xalq Cümhuriyyətinin banilərindən biri olan Məmməd Əmin Rəsulzadənin anadan olmasının 125 illiyi münasibətilə “Ümüd” Partiyasının qərargahında keçirdikləri toplantıdan reportaj hazırlayarkən İsmayıl İsmayılov adlı şəxs tərəfindən fiziki təzyiqə məruz qalıb. O, Mehdiyevi nalayiq ifadələrlə təhqir edib və sonra masanın üzərində olan külqabını götürərək jurnalistə atıb. Atılan külqabı Mehdiyevin sol gözünün altından (almacıq hissədən) dəyib və jurnalist xəsarət alıb. Baş vermiş hadisə ilə bağlı rəsmi qaydada Naxçıvan Muxtar Respublikası Daxili İşlər Nazirliyinə müraciət olunub və şikayət ərizəsi DİN-in müstəntiqi Hikmət Əliyevin icraatına verilib. Amma müstəntiq bu müddət ərzində baş vermiş hadisə ilə bağlı heç bir tədbir görməyib və ya gördüyü tədbirlər barədə zərərçəkmişə hər hansı bir məlumat verməyib. Jurnalistə xəsarət yetirən şəxs də hazırda azadlıqdadır. Müxbirin polisin hərəkətsizliyindən verdiyi şikayət ərizəsi də Naxçıvan şəhər Məhkəməsi tərəfindən rədd edilib.