Sentyabrın 11- də Bakı Ağır Cinayətlər Məhkəməsində hakim Azər Orucovun sədrliyi ilə “Tolışi sədo” qəzetinin baş redaktoru Hilal Məmmədovun işi üzrə məhkəmə iclası keçirilib.
Proses dövlət ittihamçısının çıxışı ilə davam edib. Dövlət ittihamçısı iş üzrə qısa arayışla çıxış edərək, Məmmədovun 6 il müddətinə azadlıqdan məhrum edilməsini məhkəmədən istəyib. Dövlət ittihamçısının bu sözləri Məmmədovun etirazına, eləcə də zalda əyləşən ailə üzvlərinin böyük narazılığına səbəb olub. Nəticədə dövlət ittihamçısı zalı tərk etmək məcburiyyətində qalıb. Hakim A. Orucov qısa fasilədən sonra növbəti proses zamanı müdafiə vəkillərinin çıxışlarının dinləniləcəyini deyərək, məhkəməni 25 sentyabr saat 11:00-a təyin edib.
Xatırladaq ki, Hilal Məmmədov Cinayət Məcəlləsinin 234.4.3-cü (Qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama), 274-cü (dövlətə xəyanət) və 283-cü (milli, irqi, sosial və ya dini nifrət və düşmənçiliyin salınması) maddələri ilə ittiham edilir.