Dünən (29 yanvar) hakim Müseyib Bayramovun sədrliyi ilə 1 saylı Bakı Yerli İqtisad Məhkəməsində Dövlət Radiotezliklər İdarəsinin "Simurq-M" Müstəqil Teleradio Şirkətinə qarşı borcunun ödəməməsi iddiası üzrə məhkəmə prosesi keçirilib.
İddiaçı tərəfin nümayəndəsinin 1 saylı Bakı Yerli İqtisad Məhkəməsinə ünvanladığı şikayət ərizəsində aralarında mövcud olan müqavilənin şərtlərinin pozulduğunu bildirərək, şirkətin almış olduğu tezliyin müqabilində 9000 manat tələb edir. Prosesdə hər iki tərəfin nümayəndələri dindirilib. Cavabdeh tərəf Dövlət Radiotezliklər İdarəsinə borclu olduğunu etiraf edərək, pulu qısa müddət ərzində ödəyəcəyinə söz verib. Hakim Müseyib Bayramovun RATİ-yə verdiyi məlumata görə, artıq cavabdeh tərəf borcun bir hissəsini ödəyib. Hakim əlavə etdi ki, növbəti proses 10 fevral tarixinə təyin olunub.
Məsələ ilə bağlı əlaqə saxladığımız "Simurq-M" Müstəqil Teleradio Şirkətindən adını demək istəməyən əməkdaş bildirdi ki, tərəflərin problemi həll edilib və məhkəmə işi bağlanıb. Radiotezliklər İdarəsinin özünü təqdim etməyə səlahiyyəti çatmadığını bildirən əməkdaşı isə hadisədən ümumiyyətlə xəbərsiz olduğunu dedi.
Xatırladaq ki, regional televiziya olan "Simurq M" TV Tovuz rayonunda fəaliyyət göstərir.