İRANDA HƏBS OLAN AZƏRBAYCANLI ƏDİBLƏRİN AZAD EDİLMƏSİ TƏLƏBİ İLƏ BAKIDA AKSİYA KEÇİRİLDİ

avqust 7th, 2012
Avqustun 6-da İranda həbs olunmuş azərbaycanlı şairlərin azad edilməsi tələbi ilə bu ölkənin  Azərbaycandakı  səfirliyinin qarşısında keçirilən aksiyada onlarla jurnalist iştirak edib. Aksiya Reportyorların Azadlıq və Təhlükəsizlik İnstitutunun təşəbbüsü ilə keçirilib.

Aksiyada müxtəlif KİV-lərin nümayəndələri iştirak ediblər.
RATİ   qabaqcadan aksiyanın keçirilməsi ilə bağlı Bakı şəhər İcra Hakimiyyətinə müraciət etsə də, hakimiyyət piketin keçirilməsinə razılıq verməyib.
Polis aksiya iştirakçılarının qarşısını səfirlikdən  təxminən 100 metr aralıda yerləşən 32 saylı orta məktəbin yanında  kəsib və zorakılıqla onların əllərindəki plakatları alaraq cırıb. Buna baxmayaraq RATİ sədri piketin  qətnaməsini oxumağa müvəffəq olub və  “Qanun” nəşrlər evinin rəhbəri Şahbaz Xuduoğlu piketin qətnaməsini  səfirliyə təqdim edib.
Qətnamədə  deyilir ki, İranda həbs olunmuş gənc  şairlər Fərid Hüseyn və Şəhriyar Hacızadə İran və Azərbaycan arasında qarşıdurmanın qurbanına çevrilib. Bu gərgin münasibətin qurbanları içərisində İran mediasının nümayəndəsi də var.
“Biz İran hakimiyyətini söz azadlığına hörmətlə yanaşmağa və heç bir qanunu pozmayan, “sərhədin keçilməsi qaydalarının pozulması” kimi uydurma ittihamla saxlanılan azərbaycanlı ədibləri azad etməyə çağırırıq”, – deyə  sənəddə vurğulanır.
Xatırladaq ki,  Azərbaycanlı şairlər  mayın 2-də Tehrandan Bakıya gələrkən Təbrizdə saxlanılıblar və sabah  (7 avqust)Təbrizdə ədiblərin məhkəməsi keçiriləcək.
Rəsmi Bakı İran XİN-ə beş nota göndərərək onların azad olunmasını tələb edib Yalnız bir həftə öncə İran hakimiyyəti Azərbaycanın Təbrizdəki konsulluğunun işçisinin həbs olunanlara baş çəkməsinə icazə verib.