Yaxın günlərdə “Caspian Plaza” otelinin konfrans zalı fəaliyyətini dayanacaq.
Bu barədə məlumatı RATİ-yə otelin meneceri Elşən Süleymanov verib.
Onun sözlərinə görə, buna səbəb otelin həyətində tikiləcək avtomobil qarajı və konfrans zalının üst mərtəbəsində gedən təmir işləridir: “Təmir-tikinti işlərinin gedişi ilə bağlı səs-küy yaranır. Bu isə konfransların gedişatına mane olacaq. Buna görə də konfrans zalının fəaliyyətinin oktyabrın sonuna qədər dayandırılması haqqında qərara gəlmişik”.
Qeyd edək ki, artıq indiyə qədər bir neçə mətbuat mərkəzi təxminən eyni səbəbə görə fəaliyyətini dayandırıb. Yeri gəlmişkən, qeyd edək ki, 2008-ci il oktyabrın 15-də Azərbaycanda prezident seçkiləridir. Bəzi analitiklər mətbuat mərkəzlərinin təmirə dayanmasını həm də seçkilərlə əlaqələndirirlər.