İyulun 25-də RATİ əməkdaşı Rasim Əliyev və “Kanal 13” internet televiziyasının əməkdaşı Hüseyn Əzizoğlu Prezident Administrasiyasının qarşısında olan aksiya zamanı öz peşə fəaliyyətlərini yerinə yetirərkən təzyiqə məruz qalıblar. Bu barədə Reportyorların Azadlıq və Təhlükəsizlik İnstitutuna (RATİ) jurnalistlərin özləri məlumat verib.
RATİ əməkdaşı Rasim Əliyevin sözlərinə görə bir qrup “Qara şəhər” sakinləri evlərinin sökülməsinə görə aldıqları kompensasiyanın azlığı səbəbi ilə Prezident Administrasiyasının qarşısında aksiya keçiriblər və bu zaman baş verənləri videoya çəkərkən mülki geyimli şəxslərin hücumuna məruz qalıb.
“Sakinlərin keçirdiyi aksiyanı video ilə çəkirdim və bu zaman bir neçə mülki geyimli şəxs mənə yaxınlaşaraq, kameranı onlara verməyimi tələb etdi. Bunu etmək istəmədiyimdə, kameranı zorla əlimdən alaraq, binanın görüntülərini silib, camaat dağılışandan sonra kameranı qaytaracaqlarını bildirdilər. Halbuki mən ancaq narazılıq edən sakinlərin müsahibəsini çəkmişdim, bina kadrda yox idi. Kameramı qaytardıqdan sonra isə bütün çəkdiklərimin tamamilə silindiyini gördüm” –deyə jurnalist bildirib.
Digər jurnalist “Kanal 13” internet televiziyasının əməkdaşı Hüseyn Əzizoğlu RATİ-yə açıqlamasında, həmkarı ilə eyni təzyiqə məruz qaldığını və kamerası qaytarıldıqdan sonra bütün kadrların silindiyini bildirib.
“Baş verən hadisə ilə bağlı hüquq mühafizə orqanlarına müraciət edəcəyəm” –deyə Hüseyn Əzizoğlu əlavə edib.