Bu gün (29 yanvar) Bakı Apellyasiya Məhkəməsində hakim Rizvan Səfərovun sədrliyi ilə "Azadlıq" qəzetinin satirik yazarı Mirzə Sakitin (Zahidov) apellyasiya şikayətinə əsasən, hazırlıq iclası keçirildi. İclasda vəkil İsaxan Aşurov və prokuror Elgün Qafarov iştirak edirdilər.
İ.Aşurov hakimə vəsatət təqdim edərək, 14 saylı cəzaçəkmə müəssisəsinin rəisi Ərşad Həsənovun məhkəmədə dindirilməsini təmin etməyi xahiş etdi. Belə ki, Sakit Zahidovun cəzadan şərti olaraq vaxtından əvvəl azad edilməsinə dair ərizəsinin birinci instansiya – Nərimanov rayon məhkəməsi tərəfindən rədd olunmasına əsaslardan biri kimi, 14 saylı cəzaçəkmə müəssisəsində saxlanılarkən daxili rejim qaydalarını pozması göstərilib. Ərşad Həsənovun Mirzə Sakitə qarşı qərəzli olması və Mirzə Sakitin bir müddət əvvəl məhz bu səbəbdən 10 saylı cəzaçəkmə müəssisəsinə köçürülməsi mətbuatda dəfələrlə dərc olunub.
Hakim, növbəti prosesdə vəsatətə baxılacağını və zərurət yaranarsa, 14 saylı cəzaçəkmə müəssisəsinin rəisi Ərşad Həsənovun məhkəmədə dindirilməsini təmin edəcəyini bildirdi. Növbəti məhkəmə iclası 05 fevral 2008-ci il, saat 14.30-a təyin edildi.
Hakim, növbəti prosesdə vəsatətə baxılacağını və zərurət yaranarsa, 14 saylı cəzaçəkmə müəssisəsinin rəisi Ərşad Həsənovun məhkəmədə dindirilməsini təmin edəcəyini bildirdi. Növbəti məhkəmə iclası 05 fevral 2008-ci il, saat 14.30-a təyin edildi.
Qeyd edək ki, bu gün keçirilən ilkin baxış saat 10.00-a təyin olunsa da, prokurorun gecikməsi səbəbilə 11.30-da başladı.
Xatırladaq ki, Mirzə Sakit 2006-cı il iyun ayının 23-də narkotik vasitə ilə şərlənərək həbs olunub və Ağır Cinayətlərə Dair İşlər üzrə Məhkəmənin qərarı ilə 3 il müddətinə azadlıqdan məhrum edilib. Hazırda onun cəzasının bitməsinə təxminən 5 ay qalır.