Dünən (29 mart) Ayəndə Mürsəliyeva 17 saylı cəzaçəkmə müəssisəsində cəza çəkən həyat yoldaşı, “Azadlıq” qəzetinin baş redaktoru Qənimət Zahidlə (Zahidov) görüşüb.
Bu barədə Reportyorların Azadlıq və Təhlükəsizlik İnstitutuna (RATİ) məlumat verən A. Mürsəliyeva baş redaktorun səhhətinin normal olduğunu, həmçinin ingilis dilində mütaliyəsini davam etdirdiyini söylədi.
A.Mürsəliyevanın sözlərinə görə, Q.Zahid Azərbaycana siyasi məhbuslar üzrə xüsusi məruzəçinin təyin olunmasını insanların siyasi motivlərlə həbsinə son qoya biləcəyini vurğulayıb və mühüm məsələ kimi qiymətləndirib. Baş redaktor həmçinin amnistiyaya düşən qardaşı Mirzə Sakitin (Sakit Zahidov) azadlığa buraxılmaması barəsində də öz mövqeyini bildirib: “Bu hakimiyyətin məhbuslara fövqəladə münasibətidir”.
Xatırladaq ki, Qənimət Zahidov Cinayət Məcəlləsinin (CM) 127.2.3 (xuliqanlıq niyyəti ilə qəsdən sağlamlığa az ağır zərər vurma) maddəsi ilə şərlənərək 3 il 6 ay, CM-nin 221-ci maddəsi ilə şərlənərək 6 ay olmaqla 4 il müddətinə azadlıqdan məhrum edilib.