Dünən (8 sentyabr) KİV-in İnkişafına Dövlət Dəstəyi Fondunun Müşahidə Şurasının formalaşdırdığı komissiya 10 şikayət ərizəsini araşdıraraq yekun qiymətləndirmə aparıb.
İclasda adıçəkilən qurumların müsabiqədə qalib elan olunmamasının səbəbləri açıqlanıb. Bildirilib ki, “Yeni Xəbər” qəzetinin dövriliyində problem olduğu üçün (fəaliyyətində müəyyən dövrdə fasilə olub), Müstəqil İnformasiya Agentliyi və Regional İnsan Hüquqları və Media Mərkəzinin təsis olunma tarixləri şərtlərə uyğun gəlmədiyi üçün (fəaliyyətə başlamalarının bir ili tamam olmayıb) onların layihələri müsabiqələrə buraxılmayıb. Şəmsi Əsədullayev adına Fondun, “Reytinq”, “Xural”, “Türküstan” qəzetlərinin, Reportyor İnformasiya Agentliyinin, “Əks-səda” Beynəlxalq Jurnalist Tədqiqatları Mərkəzinin layihələri isə eyni istiqamətlər üzrə başqa layihələrdən az bal topladıqları üçün qalib elan olunmayıblar.
Komissiya ekspertlərin bu layihələr barədə rəylərini qüvvədə saxlayıb. Deyilən faktları və başqa iradları təsdiqləmək üçün bütün lazımi sənədlər şikayətçilərə təqdim olunub. Eyni zamanda şikayətçilərin dilindən səslənən bəzi iradlar, faktlar, araşdırılmaq üçün qəbul edilib.
Əvəz Zeynallı RATİ-yə onu da bildirib ki, apellyasiya komissiyasının üzvlərinin müşahidə Şurasında təmsil olunan şəxslərdən ibarət olması absurddur.
Xatırladaq ki, KİV-in İnkişafına Dövlət Dəstəyi Fondu reallaşdırdığı ilk müsabiqənin nəticələrini sentyabrın 1-də açıqlayıb. Müsabiqəyə təqdim edilən 112 layihədən 55-i qalib gəlib. Onlardan 30-u qəzet, 13-ü informasiya agentliyi, 6-sı jurnalist təşkilatı və 6-sı digər əlaqədar təşkilatlar kateqoriyasına aiddir.