Dünən (17 fevral) “Poliqon” informasiya agentliyinin redaktoru Elmin Bədəlov Azərbaycan Dövlət Neft Akademiyasından (ADNA) xaric edilməsi ilə bağlı Nəsimi Rayon məhkəməsinə müraciət edib.
Bu barədə Reportyorların Azadlıq və Təhlükəsizlik İnstitutuna (RATİ) məlumat verən E.Bədəlovun sözlərinə görə, iddia ərizəsində cavabdeh qismində həm ADNA, həm də bu akademiyanın rektoru Siyavuş Qarayevi göstərib. E.Bədəlov vurğuladı ki, iddiada imtahan nəticələrinin ləğvi və ali məktəbə yenidən bərpa olunmasını istəyib.
Qeyd edək ki, E.Bədəlovun hüquqlarını Media Hüququ İnstitutunun vəkili Fariz Namazov müdafiə edəcək.
Xatırladaq ki, Elmin Bədəlov 19 yanvar 2010-cu ildə ADNA-dan xaric olunub. O, 12 noyabr 2009-cu il tarixdə ADNA-dakı rüşvət halları və maliyyə fırıldaqları ilə bağlı pia.az saytında “Azərbaycan Dövlət Neft Akademiyasından reportaj” adlı məqalə yazdıqdan sonra təzyiqə məruz qaldığını bildirir və imtahanlardan qəzrəz nəticəsində kəsildiyini iddia edir.