Poliqon İnformasiya Agentliyinin (pia.az) redaktoru Elmin Bədəlov bu gün (04 mart) Biləsuvar rayon prokurorluğunda izahat verib. Bu barədə Reportyorların Azadlıq və Təhlükəsizlik İnstitutuna (RATİ) məlumat verən Elmin Bədəlov izahatında hərbi xidmətdən yayınmadığını, hərbi komissarlıqdan ona çağırış vərəqəsi gəlmədiyini və ali məktəbdən xaric olunmaqla bağlı əmri fevralın 2-də aldığını qeyd etdiyini bildirib.
Xatırladaq ki, Elmin Bədəlov 19 yanvar 2010-cu ildə ADNA-dan xaric olunub. O, 12 noyabr 2009-cu il tarixdə ADNA-dakı rüşvət halları və maliyyə fırıldaqları ilə bağlı pia.az saytında “Azərbaycan Dövlət Neft Akademiyasından reportaj” adlı məqalə yazdıqdan sonra təzyiqə məruz qaldığını bildirir və imtahanlardan qərəz nəticəsində kəsildiyini iddia edərək, pozulmuş təhsil hüququnun bərpa edilməsi üçün 17 fevralda Nəsimi Rayon Məhkəməsinə müraciət edib. Sabah saat 16.00-da Nəsimi rayon məhkəməsində hakim İkram Şirinovun sədrliyi ilə məhkəmə hazırlıq iclası keçiriləcək.