“Gün Səhər” qəzetində verilən xəbərə görə, ABŞ-ın Harvard universitetində təhsil alan bir qrup azərbaycanlı və digər ölkələrdən olan tələbələr Azərbaycanda mətbuat və söz azadlığının vəziyyətinə etiraz olaraq fotoaksiya keçiriblər.
Aksiya iştirakçıları əllərində “Mətbuat bizim dostumuzdur”, “Mətbuatı qoruyun” yazılmış plakatlar tutaraq Azərbaycan mətbuatına dəstək olduqlarını bildiriblər. Aksiyada iştirak edən, azərbaycanlı tələbə Bəxtiyar Hacıyev bildirib ki, aksiyada iştirak edən xarici tələbələr Azərbaycan, onun mədəniyyəti, tarixi, musiqisi və Dağlıq Qarabağ problemi bərədə kifayət qədər məlumatlıdırlar. O əlavə edib ki, “bu aksiyanın keçirilməməsini istəyənlər varsa, onlar birinci növbədə neqativ halların, düşünülməmiş qərarların verilməsini dayandırmalıdırlar”.
Məlumatda o da bildirilir ki, əgər Azərbaycanda mətbuat azadlığı sahəsində müsbət dəyişikliklər hiss edilməsə, dünyanın müxtəlif ölkələrində təhsil alan tələbələrimiz, o cümlədən Amerikanın və dünyanın nüfuzlu dövlət adamları siyasətçiləri aksiyaya qoşula bilər.