Aprelin 17-də İctimai Palatanın “Sahil” bağında keçirdiyi etiraz aksiyasının qarşısı polis tərəfindən zorakılıqla alındı. Belə ki, Polis «Sahil» bağına yaxın mərkəzi küçələri səhər saatlarından nəzarətə götürmüşdü. Səkilərdən piyadalara da keçməyə imkan verilmirdi. Avtomobil yollarına isə beton dirəklər uzadılmışdı. Habelə polis mitinq iştirakçılarının qarşısını almaq üçün metronun “Sahil” stansiyasının fəaliyyətini dayandırmışdı, sərnişinlərin bu stansiyadan istifadəsinə imkan verilmirdi. Habelə metronun “Sahil” bağına yaxın digər – 28 may stansiyasından çıxan sərnişinlərə də bağ istiqamətində hərəkət etməyə imkan verilmirdi.
Qeyd edək ki, aksiya zamanı 3 İsveçli jurnalist mülki geyimli şəxslər tərəfindən saxlanılıb. May Rohvedder Strit (My Rohwedder Street) və Şarlotta Vijstkörm (Charlotta Wijkström) və Şarli Laprevod (Charlie Laprevote) saxlanılıblar. İsveçli jurnalistlər Azərbaycanda iqtisadi inkişaf fonunda baş verən proseslərlə tanışlıq, eləcə də Azərbaycan-Avropa münasibətləri haqqında İsveç telekanalları üçün reportajlar hazırlamaq məqsədilə Azərbaycana səfər ediblər. Jurnalistlər saxlanılaraq 39-cu polis bölməsinə aparılıblar. Əməkdaşlarımız 39-cu polis bölməsinin növbətçi hissəsi ilə əlaqə saxlayıblar. Oradan əməkdaşlarımıza bildiriblər ki, artıq jurnalistləri sərbəst buraxıblar. Lakin isveçli jurnalistlər bildiriblər ki, onları DİN Baş Pasport Qeydiyyat və Miqrasiya İdarəsinin Qanunsuz Miqrasiyaya Qarşı Mübarizə İdarəsinə aparıblar. Jurnalistlərin barəsində heç bir məlumat verilmir.
Belə ki, şəhərin mərkəzində səhər saatlarından başlayan gərginlik axşam saat 19 radələrinə qədər davam etdi. Aksiya zamanı saxlanılanlar haqqında dəqiq məlumat olmasa da, rəsmi məlumatlara görə 62, qeyri-rəsmi məlumatlara görə 90 nəfərə qədər adam saxlanılıb.