“Avroviziya” musiqi yarışmasında İsveçi təmsil edən müğənni Loren öz təşəbbüsü ilə Azərbaycanda insan haqlarının durumu, “Demokratiya naminə musiqi” (Sing for Democracy) kompaniyasının fəaliyyətilə tanış olmaq üçün Reportyorların Azadlıq və Təhlükəsizlik İnstitutunun sədri Emin Hüseynov, İnsan Haqları Klubunun rəhbəri Rəsul Cəfərov və Norveç İnsan Haqları Evinin koordinatoru Şəhla İsmayılova ilə görüşüb.
Görüş zamanı qonağa Azərbaycanda insan hüquq və azadlıqları-siyasi, sərbəst toplaşmaq, söz azadlığı və mülkiyyət hüquqlarının durumu barədə məlumat verilib. Musiqiçini maraqlandıran suallar cavablandırıb. Azərbaycanda mülkiyyət hüquqlarının pozulması faktlarını özündə əks etdirən foto sərgi, “Demokratiya naminə musiqi” kompaniyası çərçivəsində hazırlanan video çarx nümayiş olunub. Yerli hüquq müdafiəçiləri İsveç müğənnisi ilə görüşü kompaniyaya dəstək kimi dəyərləndiriblər. “Avroviziya”nın yarımfinallarında və final konsertində Azərbaycanda insan haqlarının müdafiəsinə hər hansı formada dəstək çağırışı ediblər. İsveç müğənnisi Loren görüşdən məmnun qaldığını bildirib. Hər zaman insan haqlarının qorunmasına və müdafiəsinə çalışacağını, bu sırada Azərbaycanın da yer alacağını deyib.