İran İslam Respublikasının “Səhər” televiziya kanalının Azərbaycandakınümayəndəliyinin sürücüsü, Azərbaycan Respublikası vətəndaşı Ramil Dadaşova qarşı Cinayət Məcəlləsinin (CM) 241.1 maddəsi (Narkotik vasitələrin və ya psixotrop maddələrin qanunsuz dövriyyəsindən əldə edilmiş pul vəsaitini və ya digər əmlakı leqallaşdırma) ilə irəli sürülən ittiham üzrə cinayət işi yekunlaşıb.
Bu barədə Reportyorların Azadlıq və Təhlükəsizlik İnstitutuna (RATİ) R. Dadaşovun vəkili Qəhrəman Pirməmmədov məlumat verib.
Vəkilin sözlərinə görə, iş Sumqayıt Şəhər Məhkəməsinin hakimi Zeyqəm Hüseynovun icraatındadır və məhkəmə iclasının keçiriləcəyi tarix hələ də müəyyənləşməyib.
Xatırladaq ki, İran İslam Respublikasının “Səhər” televiziya kanalının sürücüsü Ramil Dadaşov fevralın 17-də yaşadığı Sumqayıt şəhərində saxlanılıb və həmin günü Sumqayıt Şəhər Məhkəməsi onun barəsində 2 aylıq həbs qətimkan tədbiri seçib. Fevralın 24-də Sumqayıt Apellyasiya Məhkəməsi bu qərardan verilən şikayəti təmin etməyib. Hal-hazırda o Şüvəlan İstintaq Təcridxanasında saxlanılır.