“Azadlıq” qəzetinin direktoru Azər Əhmədov dünən (18 mart) MTN-ə çağırılıb. Bu barədə Reportyorların Azadlıq və Təhlükəsizlik İnstitutuna (RATİ) məlumat verən Azər Əhmədov bildirib ki, MTN-də rəsmi olaraq “Monitor” jurnalının baş redaktoru Elmar Hüseynovun qətli ilə bağlı ifadə verib.
“Əslində mənimlə milli dəyərlər, vətənpərvərlik, dünyəvi dəyərlər və sairə barədə söhbət etdilər”, – deyə o qeyd edib. A. Əhmədov MTN-ə saat 16.00-da dəvət edilib və o 2 saat yarımdan sonra sərbəst buraxılıb.
Bu gün (19 mart) “Millətim” qəzetinin baş redaktoru Fərəməz Novruzoğlu da 5 saata yaxın MTN-də olaraq Elmar Hüseynovun qətli barədə yazdığı məqalələrlə bağlı ifadə verib. Novruzoğlu dindirilmənin normal şəraitdə keçdiyini, ondan yalnız Hüseynovun qətli ilə bağlı 2005-ci ildə və bu yaxınlarda yazdığı məqalələrlə bağlı sualların soruşulduğunu bildirdi. RATİ-nin əməkdaşı ilə söhbətində F. Novruzoğlu məqalələrdə yazdığı fikirləri bir daha istintaqın diqqətinə çatdırdığını və bu fikirlərdə qaldığını dedi.