ABŞ prezidentinin sözlərinə görə, Amerika öz azadlığı uğrunda mübarizə aparan şəxslərlə, o cümlədən risk altında işləməyi davam etdirən mətbuat nümayəndələri ilə bir yerdədir. 2007-ci ildə ABŞ təxminən 40 ölkədə media azadlığını müdafiə etmək üçün 78 milyon dollar ayırıb. “Prezident kimi mən media azadlığını boğan qüvvələrə qarşı mübarizə aparan bir sıra jurnalist və redaktorlarla görüşmüşəm. Biz bu cəsur insanları alqışlayırıq və bütün dünyada azadlığın yayılmasında azad mətbuatın vacibliyini anlayırıq”, – deyə Buş əlavə edib.
APA-nın yaydığı məlumata görə, Azərbaycan Xarici İşlər Nazirliyinin mətbuat katibi Xəzər İbrahim ABŞ prezidentinin KİV-lə bağlı vəziyyətin pis olduğu ölkələr sırasında Azərbaycanın adının çəkilməsini qeyri-dəqiq məlumatların ifadə olunması kimi qiymətləndirib: “İkitərəfli münasibətlərimizdə yarımçıq məlumatlara yer verilməsini istəməzdik. Biz ABŞ tərəfinin ikitərəfli münasibətlərin səviyyəsini nəzərə alaraq və real vəziyyətə əsaslanaraq öz bəyanatlarında yoxlanılmış, dəqiq faktlardan istifadə etməsini istəyirik”.