Vasif Turanın sözlərinə görə, yanğın axşam 11 saatlarında baş verib, o özü və həyat yoldaşı evdə olmayıb. Ev birmərtəbəli olsa da 11 və 9 yaşlı oğulları evi tərk edə, qapını aça və ya pəncərədən tullana bilməyiblər. Bundan başqa, yanğın zamanı evdə partlayış olub, baxmayaraq ki, evdə qaz yox idi. Atanın və onun vəkilinin evin yandırılmasına və içəridə kiminsə atdığı partlayıcı maddələr olmasına dair ciddi şübhələri var.
Faktla bağlı polisdə deyil, Fövqəladə Hallar Nazirliyinin Baş İstintaq İdarəsində cinayət işi açılıb. Nazirlik bunu yanğın faktı kimi izah edib. Ekspertizada göstərilib ki, yanğının səbəbi qısa qapanma olub. Vasif Turan və onun vəkili isə bununla qətiyyən razılaşmır, olayda yandırma faktı olduğunu iddia edirlər. Belə ki, ərazi üstündə çəkişmələri olan yerli kərpic zavodunun direktoru ilə Vasif Turan arasında dəfələrlə problem yaşanıb. Zavodun direktoru hər dəfə nazir Kəmaləddin Heydərovun qohumu olması ilə lovğalanıb.
Zərərçəkmişin ölkə prezidentinə, DİN rəhbəri və MM spikerinə, Baş Prokurora müraciətləri, Vasif Turanın Baş Prokurorluğun İstintaq İdarəsinə çağırılaraq məsələnin aydınlaşdırılacağına vəd verilməsini nəzərə almasaq, nəticə verməyib.