Oktyabrın 25-də saat 12.10 radələrində “Yeni Azərbaycan” qəzetinin baş redaktoru Hikmət Məmmədov avtomat silahla hədələnib.
Bu barədə məlumat APA-ya Daxili İşlər Nazirliyinin mətbuat xidmətindən daxil olub. Hadisə Nəsimi rayonundakı Dilarə Əliyeva küçəsində baş verib. Belə ki, baş redaktor “Toyota” markalı avtomaşınını idarə edərkən ondan asılı olmayan səbəbdən “Mercedes” markalı avtomaşının sürücüsü ilə aralarında münaqişə baş verib. Həmin sürücü avtomaşının yük yerindən avtomat silahı çıxararaq H. Məmmədovu hədələyərək hadisə yerindən getsə də, Nəsimi rayon Polis İdarəsi 22-ci Polis Bölməsi əməkdaşlarının keçirdikləri əməliyyat-axtarış tədbirləri nəticəsində hadisəni törədən Məmməd Əmin Rəsulzadə qəsəbəsinin sakini Ənvər Sadıqov tutulub. Onun M. Fətəli küçəsi ev 152-də kirayə götürdüyü mənzilə baxış zamanı 1 ədəd “AK” silahı, 29 ədəd avtomat gülləsi və 1 ədəd güllə darağı aşkar edilərək götürülüb.
Hikmət Məmmədov isə “Turan”a açıqlamasında həmin şəxsi ilk dəfə gördüyünü və baş verən hadisənin jurnalist fəaliyyəti ilə bağlı olmadığını bildirib.
Hikmət Məmmədov isə “Turan”a açıqlamasında həmin şəxsi ilk dəfə gördüyünü və baş verən hadisənin jurnalist fəaliyyəti ilə bağlı olmadığını bildirib.