Noyabrın 19-da Salyan rayon Məhkəməsi həbsdə olan gənc blogger Emin Millinin (Abdullayev) cəzasının yarısını çəkməsi ilə əlaqədar onun vaxtından əvvəl azadlığa buraxılması barədə müraciətini təmin edib.
Bu barədə bu gün (19 noyabr) Reportyorların Azadlıq və Təhlükəsizlik İnstitutuna (RATİ) vəkil İsaxan Aşurov məlumat verib.
Onun sözlərinə görə, məhkəmə 17 ay həbsdə olan Emin Millinin vaxtından əvvəl şərti olaraq azadlığa buraxılması barədə qərar qəbul edib. Məhkəmə qalan 13 ay cəza müddətinin şərti çəkilməsini qərara alıb. Emin Milli məhkəmə zalından azadlığa buraxılıb.
Qeyd edək ki noybarın 18-də Emin Milli ilə birlikdə həbs olunmuş Adnan Hacızadə də şərti olaraq azadlığa buraxılıb.
Xatırladaq ki, gənc bloggerlər – Emin Milli və Adnan Hacızadə 2009-cu il iyulun 8-də "Livan" restoranında baş vermiş insidentlə əlaqədar həbs ediliblər. Gənclərin döyülməsinə baxmayaraq, onlar özləri xuliqanlıq və bədən xəsarətləri yetirmək ittihamları ilə müvafiq olaraq 2 il 6 ay və 2 il müddətinə azadlıqdan məhrum olunublar.
Yerli və beynəlxalq demokratik ictimaiyyət isə əmindir ki, bloggerlər fərqli siyasi düşüncələrinə görə saxta ittihamla həbs olunublar.
Foto: www.irfs.az