“Azadlıq” qəzetinin İsmayıllı rayonunda yaşayan bölgə müxbiri Elçin İsmayıllı izlənilməsi və təhdidlərlə üzləşməsi barədə bir neçə gün əvvəl hüquq-mühafizə orqanlarına etdiyi müraciətə əsasən, fevralın 8-də İsmayıllı Rayon Polis Şöbəsinə (RPŞ) çağırılıb. Bu barədə Reportyorların Azadlıq və Təhlükəsizlik İnstitutuna məlumat verən jurnalistin sözlərinə görə, onu RPŞ-nin rəis müavini Əbülfəz Bədəlov qəbul edib.
“İsmayıllıda 23-24 yanvarda baş verən hadisələrdən sonra izlənməyimlə bağlı mətbuata məlumat verdikdən sonra RATİ-nin tövsiyəsinə əsasən ərizə ilə polis və prokurorluq orqanlarına müraciət etdim. Müraciətimin araşdırılması çərçivəsində bu gün (8 fevral) RPŞ-də ifadə verdim. Həmçinin polisdə bildirdim ki, təhdidlərlə bağlı mətbuatda məlumatlar dərc olunduqdan sonra artıq bu cür hallar baş vermir” – deyə E.İsmayıllı bildirib. O əlavə edib ki, rəis müavini ona təhlükəsizliyi ilə bağlı bütün problemlərin həll olunacağını bildirib.